អាជ្ញាធរខេត្តកំពង់ចាម ផ្ដាំផ្ញើទៅមន្ត្រីនគរបាលដែលទទួលបានវគ្គបណ្តុះបណ្តាលជំនាញផ្សេងៗថា ពួកគេគប្បីត្រូវយកចំណេះដឹងរបស់ខ្លួនទៅបម្រើប្រយោជន៍ប្រជាពលរដ្ឋប្រកបដោយក្រមសីលធម៌ និងអនុវត្តទៅតាមច្បាប់។ ការលើកឡើងនេះ ក្នុងពិធីបិទបញ្ចប់វគ្គបំប៉នជំនាញកងអន្តរាគមន៍ពិសេស នៃស្នងការដ្ឋាននគរបាលខេត្តកំពង់ចាម កាលពីព្រឹកថ្ងៃទី២៩ វិច្ឆិកា។
ជំនាញបណ្តុះបណ្តាលសម្រាប់មន្ត្រីកងអន្តរាគមន៍ពិសេសចំនួន ១០៥នាក់រួមមានជំនាញទប់ទល់បាតុកម្ម កូដកម្ម ជំនាញបង្ការ និងពន្លត់អគ្គិភ័យ ជំនាញសង្គ្រោះបឋមដល់ប្រជាពលរដ្ឋ ដូចជាខ្យល់គ លង់ទឹក ស្ទះផ្លូវដង្ហើម គ្រោះមហន្តរាយផ្សេងៗ ដើម្បីធានាឲ្យបាននៅពេលមានបញ្ហាកើតឡើង។
វគ្គបណ្តុះបណ្តាលជំនាញទាំងនេះបានដំណើរការអស់រយៈពេលចំនួន ៤៥ថ្ងៃសម្រាប់កងអន្តរាគមន៍ពិសេសនៅខេត្តកំពង់ចាម ហើយបានបិទបញ្ចប់ក្រោមអធិបតីភាពរបស់អគ្គស្នងការរងនគរបាលជាតិ លោក គៀត ច័ន្ទថារិទ្ធ និងអភិបាលខេត្តកំពង់ចាម លោក លន់ លឹមថៃ។
អភិបាលខេត្តកំពង់ចាម លោក លន់ លឹមថៃ មានប្រសាសន៍ផ្តាំផ្ញើទៅមន្ត្រីនគរបាលទាំងនោះថា ពួកគេត្រូវយកជំនាញ និងចំណេះដឹងដែលខ្លួនទទួលបានទៅបម្រើប្រជាពលរដ្ឋប្រកបដោយគុណធម៌ និងយុត្តិធម៌។ លើសពីនេះ ធ្វើយ៉ាងណាឲ្យទឹកដីនៃខេត្តមួយនេះប្រកបទៅដោយសុខសន្តិភាពគ្រប់គ្រាន់ ដែលជាបំណងប្រាថ្នារបស់ពលរដ្ឋ។ លោកថា មន្ត្រីនគរបាលត្រូវខិតខំសិក្សារៀនសូត្រដោយខ្លួនឯងបន្ថែមទៀត ដើម្បីឲ្យចំណេះដឹងដែលខ្លួនទទួលបានកាន់តែរីកចម្រើន៖ «អ៊ីចឹងទេ ខ្ញុំសង្ឃឹមយ៉ាងមុតមាំថា នឹងយកចំណេះដឹងនេះទៅអនុវត្តប្រកបដោយគុណធម៌ប្រកបដោយយុត្តិធម៌ និងដើម្បីសម្រេចគោលដៅចុងក្រោយនោះ គឺការពារប្រទេសជាតិ ការពាររាជរដ្ឋាភិបាលស្របច្បាប់ ការពារព្រះមហាក្សត្ររបស់យើង»។
ក្នុងពិធីបិទវគ្គបំពាក់បំប៉ននេះដែរ គឺមានការចូលរួមពីស្នងការនគរបាលខេត្តជិត២០ នៅទូទាំងប្រទេស ដើម្បីបានស្វែងយល់ និងរៀនសូត្រតាម។ ជាមួយគ្នានេះ ជំនាញមួយចំនួនត្រូវបានយកមកបង្ហាញឲ្យអ្នកចូលរួមបានទស្សនា ដូចជាជំនាញទប់ទល់ ឬរំសាយក្រុមបាតុកម្ម។ សកម្មភាពនេះ ប្រៀបដូចជាហេតុការណ៍កើតឡើងជាក់ស្តែង ដោយមានកម្លាំងទប់ទល់ មានខែល ដំបង គ្រាប់បែកផ្សែង ឡានទឹក ជាដើម។ ចំណែកក្រុមដើរតួនាទីជាបាតុករវិញ គឺមានដំបង មានដបទឹកច្រកខ្សាច់ តំណាងឲ្យដបសាំងសម្រាប់តតាំងជាមួយសមត្ថកិច្ច។
អភិបាលខេត្តដដែលបញ្ជាក់ថា វគ្គបណ្តុះបណ្តាលពុំមែនដើម្បីត្រៀមបង្ក្រាបបាតុកម្មណាមួយនោះឡើយ ប៉ុន្តែជាការលើកកម្ពស់សមត្ថភាពរបស់មន្ត្រីនគរបាល ហើយលោកថាប្រទេសណាក៏មានវគ្គបណ្ដុះបណ្ដាលបែបនេះដែរ។
ស្នងការនគរបាលខេត្តកំពង់ចាម លោក បែន រ័ត្ន ដែលជាអ្នករៀបចំឲ្យមានវគ្គបណ្តុះបណ្តាលជំនាញកងអន្តរាគមន៍ពិសេសនេះឡើង មានប្រសាសន៍កាលពីថ្ងៃទី២៩ វិច្ឆិកា ថា គោលបំណង គឺដើម្បីបម្រើប្រជាពលរដ្ឋ ព្រមទាំងការពារស្ថាប័នរបស់ជាតិ។ លោកបញ្ជាក់ថា ខេត្តកំពង់ចាម ជាខេត្តទីមួយដែលរៀបចំឲ្យមានវគ្គបំប៉នជំនាញកងអន្តរាគមន៍ពិសេសបែបនេះ៖ «ពីព្រោះយើងបានទទួលអំណាចពីរាជរដ្ឋាភិបាលតែមួយគត់ គឺអំណាចបម្រើប្រជាពលរដ្ឋ»។
លោកបង្ហាញពីមោទនភាពចំពោះការបញ្ចប់វគ្គបំប៉នជំនាញកងអន្តរាគមន៍ពិសេសនេះទៀតផង។ ជាមួយគ្នានោះ លោកថែមទាំងលើកឡើងអំពីជោគជ័យក្នុងកិច្ចការពារសន្តិសុខសុវត្ថិភាពជូនប្រជាពលរដ្ឋនៅខេត្តកំពង់ចាម ក្នុងរយៈពេលប្រមាណពីរឆ្នាំចុងក្រោយ ព្រមទាំងសកម្មភាពផ្សេងៗទៀតដែលមន្ត្រីនគរបាលបានបម្រើប្រជាពលរដ្ឋ។
ទោះបីជាយ៉ាងនេះក្តី ស្នងការនគរបាលខេត្តរូបនេះត្រូវបានអគ្គស្នងការនគរបាលជាតិ សម្រេចផ្ទេរភារកិច្ចពីស្នងការនគរបាលខេត្តកំពង់ចាម ទៅធ្វើជាស្នងការនៅខេត្តត្បូងឃ្មុំ ជំនួសលោក ម៉ៅ ពៅ ហើយពិធីផ្ទេរតំណែងជាផ្លូវការ គឺធ្វើឡើងនៅព្រឹកថ្ងៃទី៣០ វិច្ឆិកា។
មន្ត្រីសម្របសម្រួលអង្គការលីកាដូ (LICADHO) ខេត្តកំពង់ចាម លោក ប៊ូ វីរៈ យល់ថា កងកម្លាំងទាំងនេះ គឺតែងតែបង្កើតឲ្យមានដើម្បីរក្សាសន្តិសុខជូនប្រជាពលរដ្ឋ ប៉ុន្តែលោកមើលឃើញថា កន្លងមកការចាត់វិធានការរបស់អាជ្ញាធរលើក្រុមបាតុករ គឺមានភាពសាហាវ ពិសេសនៅរាជធានីភ្នំពេញ។ ចំណែកការបណ្តុះបណ្តាលវគ្គនេះ លោកថាពុំគួរធ្វើឡើងនៅក្នុងទីក្រុង ឬទីប្រជុំជនឡើយ ពីព្រោះអាចធ្វើឲ្យប៉ះពាល់ដល់អារម្មណ៍ប្រជាពលរដ្ឋ ពិសេសធ្វើឲ្យពួកគេភ័យខ្លាច៖ «ភ័យខ្លាចត្រង់ណាប្រហែលជានៅខេត្តកំពង់ចាម ឬសភាពការណ៍នៅថ្ងៃខាងមុខអី ប្រាកដជាមានបាតុកម្មផ្ទុះឡើង ហើយមានកម្លាំងប្រដាប់អាវុធរបស់អាជ្ញាធរខេត្តជាអ្នកបង្ក្រាប»។
លោកបន្ថែមថា ដើម្បីឲ្យការបណ្តុះបណ្តាលវគ្គទាំងនេះបម្រើប្រយោជន៍ប្រជាពលរដ្ឋពិតប្រាកដ មន្ត្រីនគរបាលទាំងអស់ត្រូវទទួលការអប់រំបន្ថែមទៀត ទាំងផ្នែកច្បាប់ និងការគោរពសិទ្ធិមនុស្ស ពិសេសអប់រំដល់មន្ត្រីដែលមានតួនាទីធំៗ ព្រោះជាអ្នកបញ្ជានៅពេលមានហេតុការណ៍ណាមួយកើតឡើង៕
