 |
| សហគមន៍ជនជាតិដើមភាគតិចព្នង ភូមិពូត្រែង ឃុំដាក់ដាំ ស្រុកអូររាំង ខេត្តមណ្ឌលគិរី បង្ហាញទីតាំងខ្ទមអ្នកតាដែលមន្ត្រីសាលាស្រុកឈូសឆាយយកដីនៅថ្ងៃទី២២ ខែវិច្ឆិកា ឆ្នាំ២០១៦ |
សហគមន៍ព្នងភូមិពូត្រែង ឃុំដាក់ដាំ ស្រុកអូររាំង ខេត្តមណ្ឌលគិរី មិនទាន់ទទួលបានដំណោះស្រាយសមស្របទាក់ទិនការឈូសឆាយដីប៉ះពាល់តំបន់ទួលអ្នកតា ទីសក្ការៈរបស់សហគមន៍នៅឡើយ។ អ្នកភូមិបដិសេធការសម្របសម្រួលផ្ដល់សំណងសែនព្រេនដែលអាជ្ញាធរភូមិ ឃុំសម្រេចដោយគ្មានការចូលរួមពីតំណាងសហគមន៍។
តំណាងសហគមន៍ភូមិពូត្រែង ឃុំដាក់ដាំ អំពាវនាវឲ្យអាជ្ញាធរពាក់ព័ន្ធពន្លឿនការដោះស្រាយសំណងសែនព្រេនជំនឿប្រពៃណីពាក់ព័ន្ធមន្ត្រីអាជ្ញាធរស្រុកឈូសឆាយដីប៉ះពាល់តំបន់ខ្ទមអ្នកតាសហគមន៍។
ប្រធានសហគមន៍ លោក ព្យាន ច្រែន បញ្ជាក់នៅថ្ងៃទី២១ ខែមករា ថា សហគមន៍បដិសេធមិនទទួលយកការសម្របសម្រួលរៀបចំឡើងដោយមន្ត្រីភូមិឃុំទេ ពីព្រោះមិនមានវត្តមានតំណាងសហគមន៍ និងចាស់ទុំចូលរួមសម្រេច។ លោកកត់សំគាល់ថា ស្ត្រីៗជាសមាជិកសហគមន៍ប្រមាណ ១០នាក់ត្រូវបានអាជ្ញាធរអញ្ជើញចូលរួមសម្របសម្រួលទទួលប្រាក់សំណង ក៏ប៉ុន្តែអ្នកភូមិភាគច្រើនបដិសេធមិនទទួលយកដំណោះស្រាយនោះទេ៖ «មកពីភ្នំពេញ ដល់ផ្ទះកូនខ្ញុំប្រាប់ថា គេដោះស្រាយឲ្យ ១០០ កាលនោះខ្ញុំទារ ២ពាន់ដុល្លារ ខ្ញុំថាអត់ចង់ទេ យើងអត់ព្រមទេ ប្រាក់ផាកពិន័យផ្សេង សែនព្រេនផ្សេង»។
សហគមន៍ភូមិពូត្រែង កាលពីខែវិច្ឆិកា ឆ្នាំ២០១៦ បានដាក់ពាក្យប្តឹងមន្ត្រីសាលាស្រុកអូររាំង លោក ខៀវ ព្រិល ពីបទឈូសឆាយដីប៉ះពាល់តំបន់សក្ការៈសហគមន៍ និងទាមទារសំណងសែនព្រេន ២ពាន់ដុល្លារ។ រហូតដល់ខែធ្នូ ឆ្នាំ២០១៦ មន្ត្រីអាជ្ញាធរភូមិ ឃុំ បានសម្របសម្រួលឲ្យភាគីចុងចោទផ្ដល់សំណងសែនព្រេនខ្ទមអ្នកតាជាប្រាក់ ១០០ដុល្លារ ក៏ប៉ុន្តែចាស់ទុំ និងតំណាងសហគមន៍មិនយល់ស្រប។
ប្រធានភូមិពូត្រែង លោក ប្លង់ សេង បញ្ជាក់ដែរថា បន្ទាប់ពីសហគមន៍បដិសេធនោះមក ដំណោះស្រាយការតវ៉ារបស់សហគមន៍អូសបន្លាយរហូតបច្ចុប្បន្ន ដោយសារតែភាគីទាំងពីរមិនបានជួបដោះស្រាយគ្នាបន្តឡើយ។ លោកថា អាជ្ញាធរភូមិឃុំ និងរៀបចំគម្រោងជួបជុំគ្នានេះជាថ្មី ដើម្បីបន្តដោះស្រាយបញ្ហានេះឡើងវិញ៖ «ចាស់ទុំបន្ទោសគ្នាគេទៀតថា ដោះស្រាយតែម្នាក់គាត់ថាឲ្យ ១០០ បើត្រឹម ៥០០អត់ស្អីទេ ចាំជួយដោះស្រាយក្រោយទៀត»។
កាលពីពាក់កណ្ដាលខែវិច្ឆិកា ឆ្នាំ២០១៦ សហគមន៍ពូត្រែង ប្រមាណ ៥០នាក់ បាននាំគ្នារារាំងគ្រឿងចក្ររបស់មន្ត្រីសាលាស្រុកដែលព្យាយាមឈូសឆាយដីបំពានលើដីតំបន់ខ្ទមអ្នកតាសហគមន៍មានទំហំប្រមាណកន្លះហិកតារនៅលើដីទួលនៃតំបន់ភ្នំ ឋិតនៅចម្ងាយជាងមួយគីឡូម៉ែត្រពីភូមិពូត្រែង។
អភិបាលស្រុកអូររាំង លោក ឆេង ទុនណារី បញ្ជាក់ថា អាជ្ញាធរស្រុកបានណែនាំឲ្យអាជ្ញាធរភូមិឃុំសម្របសម្រួលសងសំណងសែនព្រេននេះជូនសហគមន៍ឲ្យបានសមស្រប ក៏ប៉ុន្តែលោកមិនបានដឹងពីលទ្ធផលនៃការសម្របសម្រួលនោះទេ។
លោកថា ប្រសិនសហគមន៍មិនយល់ស្របការដោះស្រាយរបស់អាជ្ញាធរភូមិឃុំ អាជ្ញាធរស្រុកនឹងណែនាំឲ្យភាគីពាក់ព័ន្ធជួបជុំដោះស្រាយបញ្ហានេះជាថ្មីទៀត៖ «កន្លងទៅខ្ញុំបានទុកពេលឲ្យគាត់ជជែកគ្នាដោយសារបងប្អូនដែលទាមទារអត់ទាន់សម្រេចថា ត្រូវទាមទារយ៉ាងម៉េច»។
ជំនឿរបស់ជនជាតិព្នង ភូមិពូត្រែង រៀងរាល់ឆ្នាំពួកគេតែងរួមគ្នារៀបចំកាប់ជ្រូកមួយក្បាល ស្ងោរមាន់ និងស្រា ពាងតាមក្រុមគ្រួសារនីមួយៗ យកមកសែនខ្ទម អ្នកតាដែលមានឈ្មោះថា អ្នកតាឡាវអន់យើ ឬអ្នកតាត្រពាំងតាយើ ដែលអ្នកភូមិជឿថា បារមីអ្នកតានេះជួយឲ្យអ្នកភូមិទទួលបានភោគផលកសិកម្មល្អ ចៀសផុតបាតុភូតរន្ទះបាញ់ ងាប់គោ ក្របី និងស្លាប់អ្នកភូមិ ឬការពារមិនឲ្យកើតមានជំងឺរាតត្បាតក្នុងភូមិ ពិសេសគឺការពារសត្វឃ្មុំ និងគ្រោះថ្នាក់ ខណៈអ្នកភូមិស្វែងរកឃ្មុំក្នុងព្រៃជាមុខរបរ។
តំណាងសហគមន៍បញ្ជាក់ថា អ្នកភូមិនឹងយល់ព្រមសម្របសម្រួល ប្រសិនអ្នកឈូសឆាយដីសងសំណងសែនព្រេនជាប្រាក់ ២លានរៀល និងជ្រូកមួយក្បាល មាន់១ និងស្រាពីរពាង៕
